បែកគំនិតបង្កើត Original Song រវាងលោក ជុំ លីណូ និង តូនី

បន្ទាប់ពីជោគជ័យនៅក្នុងការផលិតកម្មបទចម្រៀង Original មក កាន់តែធ្វើឱ្យលោក
ជុំ លីណូ មានទំនុបចិត្តលើខ្លួន ឯង និង ខិតខំប្រឹងប្រែងផលិតបទចម្រៀងផ្ទាល់ខ្លួនដើម្បីបម្រើអារម្មណ៍ទស្សនិកជន ។ អ្វីដែលគួរឱ្យចាប់អារម្មណ៍ជាងនេះទៅទៀតនោះគឺប៉ុន្មានម៉ោងមុននេះលោក ជុំ លីណូ បានបង្ហោះបទចម្រៀងថ្មីមួយរបស់ខ្លួនដែលបានចាប់ដៃគូថ្មីជាមួយកូនខ្មែរនៅប្រទេសកាណាដា ដែលមានឈ្មោះល្បីល្បាញក្នុងបណ្តាញសង្គម គឺលោក កែវ តូនី ក្នុងបទមច្រៀងមួយដែលមានចំណងជើងថា «ជូនពរអូនបានសុខនឹងគេ» ។

ជុំ លីណូ កាន់តែមានការចាប់អារម្មណ៍ខ្លាំងពីសំណាក់ទស្សនិកជនបន្ទាប់ពីចេញទៅនៅទ្រនុំថ្មី ហើយថែមទាំងបានចេញបទចម្រៀង Original ជាច្រើន ។ សម្រាប់បទចម្រៀងថ្មីដែលមានចំណងជើងថា «ជូនពរអូនបានសុខនឹងគេ» គឺជាស្នាដៃនិពន្ធថ្មីរបស់លោក កែវ តូនី ដែលជាកូនខ្មែររស់នៅប្រទេសកាណាដា និង មានឈ្មោះបោះសម្លេងដែលមានបងប្អូនខ្មែរជាច្រើនគាំទ្រ ។ ក្រោយពីបានចេញបទចម្រៀងនេះមកគឺមានចំនួនអ្នកចូលមើល និង អ្នក Like ហើយ Share យ៉ាងច្រើនរហូតធ្វើឱ្យ ជុំ លីណូ សង្ឃឹមយ៉ាងខ្លាំងក្លាថា ការចាប់ដៃគូថ្មីរបស់ខ្លួនជាមួយលោក កែវ តូនី ពិតជាផ្ទុះខ្លាំងនៅក្នុងឆ្នាំ ២០១៧ នេះ ។

លោក ជុំ លីណូ បាននិយាយថា តាមរយៈបទចម្រៀងដែលមានចំណងជើងថា «ជូនពរអូនបានសុខនឹងគេ» គឺជាស្នាដៃដំបូងមួយដែលលោកបានចាប់ដៃគ្នាច្រៀងជាមួយលោក កែវ តូនី ដែលបទចម្រៀងនេះ គឺជាបទចម្រៀងថ្មី ស្តាយខ្មែរសុទ្ធសាធ ។ ជំហ៊ានដំបូងនេះ គឺយើងបង្ហាញពីបទចម្រៀងជាមុនសិន ចំណែក MV វិញយើងនឹងចេញនៅពេលក្រោយ ដែលមានថតពីសកម្មភាពនៅប្រទេសកាណាដា និង ស្រុកខ្មែររួមគ្នា ។

ទាំងលោក ជុំ លីណូ ក៏ដូចជាលោក កែវ តូនី ពិតជារីករាយណាស់ដែលបានចាប់ដៃគូគ្នាដើម្បីប្រឡូកទីផ្សារចម្រៀងបម្រើអារម្មណ៍ទស្សនិកជន ហើយអ្នកទាំងពីរត្រៀមនឹងច្រៀងបទចម្រៀង Original រួមគ្នានៅលើឆាកផងដែរ ។