ម្ចាស់បទ "លលកវាយំ" ចេញមកប្រតិកម្មលើបទកំពុងផ្ទុះ "លលកស្រីយំ" របស់សុខ ពិសី-នាយ ចឺម
បទចម្រៀងថ្មីរបស់ផលិតកម្មសាន់ដេដែលកំពុងទទួលការចាប់អារម្មណ៍មានចំណងជើងថា "លលកស្រីយំ" នោះ ពេលនេះពើបប្រទះនឹងបញ្ហា ក្រោយពីម្ចាស់បទដើម បានចេញមុខមកប្រតិកម្មខ្លាំងៗ ថាបានរំលោភសិទ្ធិអ្នកនិពន្ធរបស់លោក ដោយមិនបានសុំការអនុញ្ញាតិពីលោកជាមុនសោះ។
បទដើមមានចំណងជើងថា "លលកវាយំ" ច្រៀងដោយអ្នកស្រី សូ សាវឿន ហើយថ្មីៗនេះ ត្រូវបានផលិតកម្មសាន់ដេយកមកផលិតឡើងវិញចេញលើបណ្ដាញសង្គមថ្មីៗ ដោយបានច្នៃបទភ្លេងខ្លះៗ បន្ថែមចង្វាក់រ៉េប និងដូរចំណងជើងទៅជា "លលកស្រីយំ" ឲ្យតារាចម្រៀង សុខ ពិសី និងនាយចឺម ច្រៀង។
បញ្ហានេះ លោក វ៉ែន សុន ដែលអះអាងថាជាអ្នកនិពន្ធទាំងទំនុកភ្លេង និងទំនុកច្រៀងលើបទដើម "លលកវាយំ" នោះ បានប្រាប់ថា លោកមានការឈឺចាប់ណាស់។
លោក វ៉ែន សុន បានសង្កត់ធ្ងន់ថា នៅពេលគេយកបទចម្រៀងរបស់លោកទៅថតសារជាថ្មីដោយគ្មានការអនុញ្ញាត គឺជាការឈឺចាប់១។ ប៉ុន្តែអ្វីដែលលោកឈឺចាប់ខ្លាំងជាងនេះទៀត ការយកបទចម្រៀង "លលកវាយំ" មកកែច្នៃប្ដូរចំណងជើង "លលកស្រីយំ" ធ្វើបទថ្មី ដោយមិនគោរពច្បាប់កម្មសិទ្ធបញ្ញា។"បើសិនជាពួកគេមិនគោរពច្បាប់ បានអីក៏គេគួរគោរពក្រមសីលធម៌នៃការផ្សាយដែរ"។ លោក វ៉ែន សុន បន្ថែម។
កវីជើងចាស់ដដែល បានបន្តទៀត ដោយប្រដូចករណីនេះ ទៅនឹងរបបប៉ុលពតដែលបានសម្លាប់អ្នកនិពន្ធអស់ជាច្រើន។ ដូច្នេះប្រសិនបើសម័យនេះ មិនមានការគោរពសិទ្ធិអ្នកនិពន្ធដែរ មិនខុសអីនឹងការសម្លាប់អ្នកនិពន្ធទៀត ដូចរបបអាវខ្មៅនោះដែរ។
លោក វ៉ែន សុន លើកឡើងបែបនេះបន្ទាប់ពីផលិតកម្មសាន់ដេរយកបទចម្រៀង "លលកវាយំ" ទៅកែចំណងជើង "លលកស្រីយំ " និងទំនុកច្រៀងសារជាថ្មី ដែលច្រៀងដោយកញ្ញា សុខ ពិសី និង នាយចឺម ប៉ុន្តែនៅក្នុងនោះមានបញ្ជាក់ថា "មរតកដើម"។
ពាក់ព័ន្ធនឹងប្រតិកម្មរបស់ម្ចាស់បទ "លលកវាយំ" ជុំវិញបទ "លលកស្រីយំ" ដែលម្ចាស់បទអះអាងថា រំលោភលើស្នាដៃខ្លួននេះ ភាគីខាងផលិតកម្មសាន់ដេរ លោក ឡាយ សុកចំរើន ជានាយកចាត់ការទូទៅ មិនទាន់ទាចសុំការអធិប្បាយទេរសៀលនេះ ដោយទូស័ព្ទរបស់លោក មិនអាចភ្ជាប់ការទាក់ទងបាន។
យោងតាមច្បាប់សិទ្ធិអ្នកនិពន្ធ និងសិទ្ធិប្រហែលដែលឡាយព្រះហស្តលេខាដោយអតីតព្រះមហាវីរៈក្សត្រ សម្ដេចព្រះនរោត្តម សីហនុ កាលពីឆ្នាំ ២០០៣ បានបរិយាយថា៖ ស្នាដៃទាំងឡាយណាដែលបង្កើតឡើងដោយបុគ្គលម្នាក់ ឬច្រើននាក់ដោយប្រើគំនិត ប្រាជ្ញា បង្កើតផលិតផល ឬស្នាដៃក្នុងផ្នែក អក្សរសាស្ត្រ វិទ្យាសាស្ត្រ សិល្បៈ ឬតូរ្យតន្ត្រី នឹងទទួលបានការគាំពារដោយច្បាប់ដោយស្វ័យប្រវត្តិ។
ដូច្នេះករណី ស្នាដៃទាំងនោះ ត្រូវបានយកមកប្រើប្រាស់ក្នុងអាជីវកម្មក្ដី ឬមិនអាជីវកម្មក្ដី ត្រូវសុំការអនុញ្ញាតពីម្ចាស់សិទ្ធិជាមុនជាដាច់ខាត។ ច្បាប់ដដែល នៅបានបរិយាយទៀតថា ការប្រើប្រាស់ស្នាដៃ ត្រូវគោរពតាម២ចំណុចនៃច្បាប់សិទ្ធិអ្នកនិពន្ធ និងសិទ្ធិប្រហាក់ប្រហែល គឺសិទ្ធិបេតិកភណ្ឌ ឬសិទ្ធិសេដ្ឋកិច្ច និងទី២ គឺសិទ្ធិសីលធម៌ ចំពោះម្ចាស់សិទ្ធិ។ ការប្រព្រឹត្តខុសពីនេះ គឺប្រាសចាកពីច្បាប់ ហើយម្ចាស់សិទ្ធិមានសិទ្ធិដាក់ពាក្យបណ្ដឹង ប្ដឹងទារសងការខូចខាតនានា៕ ប្រភព Sabay
No comments